போரில் தனக்கு உதவியதற்காக இராமர், விபீஷணனுக்கு அரங்கநாதர் சிலையை (அனந்த சயன ஸ்ரீ ரங்கநாத சுவாமி விக்கிரகம்) நினைவு பரிசாக அளித்தார். மேலும் இந்த சிலையை எங்கும் கீழே வைக்காமல் எடுத்துச் செல், தவறினால் சிலை எங்கு வைக்கன்றாயோ அங்கேயே நிரந்தரமாக தங்கிவிடும். என ஒரு எச்சரிக்கையையும் இராமபிரான் தெரிவித்தார்.
என்ன தான் விபீஷணன், இராமருக்கு நண்பன் என்றாலும் அவர் அசுரன் என்பதால் அரங்கநாதர் சிலையை அவர் இலங்கைக்கு கொண்டு செல்வதை தேவர்கள் விரும்பவில்லை. எனவே அவர் சிலையை இலங்கைக்கு எடுத்து செல்லாமல் தடுக்க வேண்டுமென விநாயக பெருமானிடம் வேண்டுகோள் விடுத்தனர். அவர்களது வேண்டுகோளை விநாயகரும் ஏற்றார்.
மன்னர் விபீஷணன் இலங்கைக்கு திருச்சி வழியே செல்லும் போது, அங்கு ஓடும் புனித காவிரி ஆற்றில் குளித்து விட்டு சந்தியாவந்தனம் செய்ய விரும்பினார். ஆனால், அரங்கநாதர் சிலையை ஒரு முறை தரையில் வைத்து விட்டால் அதை அங்கிருந்து நகர்த்த முடியாது என்ற காரணத்தால், என்ன செய்யலாம் என யோசித்து கொண்டிருந்த போது, அவ்வழியே வந்த ஒரு சிறுவனிடம் அச்சிலையைக் கொடுத்து, தான் குளித்து விட்டு வரும் வரையில் அதை வைத்துக்கொள்ளுமாறு கேட்டுக்கொண்டு குளிக்கச் சென்று விட்டார்.
ஆனால் சிறுவன் வேடத்தில் இருந்த விநாயகர், அரங்கனின் சிலையை தரையில் வைத்து விட்டார். இதைக் கண்ட விபீஷணன் கடுங்கோபங்கொண்டு அச்சிறுவனைத் தாக்க, துரத்தி சென்றார். ஒடிய சிறுவன் காவிரிக்கரை அருகே இருந்த மலை உச்சியை அடைய, அங்கு துரத்தி வந்த விபீஷணன் , கோபத்தில் அவனது தலையில் பலமாக கொட்டினார். அப்பொழுது விநாயகர் தன் சுயரூபத்தை வெளிப்படுத்தினார். மன்னர் விபீஷணன் வணங்கி ஆசி பெற்று இலங்கை திரும்பினார்.
புராணப்படி, இந்நிகழ்வு நடந்த இடமே திருச்சி மாநகரில் உள்ள மலைக்கோட்டை ஆகும். அவ்விடத்திலேயே உச்சிப்பிள்ளையார் கோயில் எழுப்பப்பட்டுள்ளது. இந்த கதைக்கேற்றபடி, இங்குள்ள விநாயகர் சிலையின் தலையில் ஒரு வீக்கம் இருப்பதை இன்றும் காணலாம்.
இக்கோயில் மலைக்கோட்டையின் உச்சியில் 273 அடி உயரத்தில் அமைந்துள்ளது. உச்சிப்பிள்ளையார் சன்னதி செல்ல 437 படிகள் உள்ளது. இம் மலையின் உச்சியில் உச்சிப்பிள்ளையார் கோயில், இடையே தாயுமானவர் கோவில், கீழே மாணிக்க விநாயகர் கோயில் என மூன்று பிரசித்தி பெற்ற திருத்தலங்கள் அமைந்துள்ளது மலைக்கோட்டையின் சிறப்பு. திருச்சி மலைக்கோட்டை கடந்த 6-ம் நூற்றாண்டில் வாழ்ந்த குணபரன் என்ற மகேந்திரவர்ம பல்லவர் ஆட்சியில் கட்டப்பட்டதாக கல்வெட்டு செய்தி கூறுகிறது. அன்று முதல் இன்று வரை மலைகோட்டை திருச்சி மாநகரத்தின் அடையாளம்.
சக்ரவர்த்தி திருமகன் இராமபிரானால் பரிசளிக்கப்பட்டு, விநாயகரால் அரங்கனின் சிலை கீழே வைக்கப்பட்ட இடமே திருவரங்கம். இதனாலேயே வைணவ தலங்களில் இது முதன்மையானது என கீர்த்தி பெற்றுள்ளது.
