மகாளய பட்சம் என்பது, ஒவ்வொரு ஆண்டும் தமிழ் மாதமான ஆவணி மாதப் பௌர்ணமிக்குப் பின் வரும் தேய்பிறை பிரதமை முதல் புரட்டாசி மாதத்தில் வரும் அமாவாசை திதி வரை உள்ள 15 நாட்கள் ஆகும். 15 நாட்கள் கொண்ட கால அளவை வடமொழியில் பட்சம் என்கின்றோம். மகாளய பட்சம் என்றால் முன்னோர்களுக்கான 15 நாட்கள் என்று பொருள்.
முன்னோர்களின் வருகை:
இந்த 15 நாட்களில் எமதர்மராஜன் மேலோகத்தில் உள்ள நம் முன்னோர்கள் பூமிக்கு வந்து தங்கள் வாரிசுகளை சந்திக்க அனுமதி அளித்துள்ளார். அதன்படி முன்னோர்கள் பித்ரு லோகத்திலிருந்து நம் இல்லத்திற்கு வருகை தந்து தங்கிச் செல்வதாக ஐதீகம்.
மகாளய பட்சத்தின் முக்கியத்துவம்
மறைந்த நம் முன்னோர்களை நினைவு கூறவும், அவர்களின் ஆசியை பெறுவதற்கும் இந்த காலம் முக்கியமானது. மகாளய பட்ச காலத்தில் செய்யப்படும் தர்ப்பணங்கள் மூலம் அவர்களின் ஆத்மா சாந்தி அடைவதாக நம்பப்படுகிறது. மேலும் பித்ரு தோஷங்கள் தீரும்.
இந்த நாட்களில் விரதம் மேற்கொண்டு, இறை வழிபாடுகளில் ஈடுபட்டு, அன்னதானம், குடை, ஆடைகள், காலணி, போர்வை ஆகியவற்றை ஏழைகளுக்கு தானம் செய்தால் நம் இல்லத்தில் வருமை,தரித்திரம் நீங்கி செல்வ வளம் சேரும். கோதானம் செய்வது, பசுக்களுக்கு உணவு வழங்க உதவுவது ஆகியன நம் தீராத பிரச்னைகளுக்குத் தீர்வாக அமையும்.
பொதுவாக தான தர்மங்கள் செய்வது மிகவும் புண்ணியமானதாகக் கருதப்படுகிறது. இதனால் நம் வாழ்வில் முன்னேற்றம் ஏற்படாமல் தடுக்கும் தடைகள் விலகும், தன, தான்ய, புத்திர பாக்கியம் ஆகியன கிடைக்கும். மகாளய பட்சத்தில் வீட்டிற்கு வரும் நம் முன்னோர்கள் நாம் செய்யும் தானங்களைப் பார்த்து நம் சந்ததியினர் நல்ல வழியில் வாழ்கிறார்கள் என அகமகிழ்ந்து நம்மை ஆசீர்வதிப்பார்கள் என்பது நம்பிக்கை.
தினசரி வழிபாடு
இந்தப் பதினைந்து நாள்களும் முன்னோர்களை வழிபட்ட பிறகே வழக்கமான பூஜைகளைச் செய்ய வேண்டும். தர்ப்பணம் செய்பவர்கள், தினமும் தர்ப்பணம் செய்த பிறகே நம் வீட்டில் பூஜையறையில் விளக்கேற்றி வழிபட்டு பிற வழக்கமான பணிகளைத் தொடங்க வேண்டும்.
மகாலய அம்மாவசை தர்ப்பணம்:
தசரா பண்டிகை துவங்கும் புரட்டாசி மாத அமாவாசை தினம் மஹாளய அமாவாசை என்று அழைக்கப்படுகிறது. நம் அத்தனை தலைமுறை முன்னோர்களுக்கும் நம்முடைய நன்றியை வெளிப்படுத்தும் விசேஷமான நாளாக மஹாளய அமாவாசை விளங்குகிறது.
மகாளய பட்ச காலத்தில் பித்ருக்களுக்குத் தர்ப்பணம், சிராத்தம், பிண்டப் பிரதானம் செய்வது முக்கியமானது. ஒவ்வொரு மாதமும் வரும் அம்மாவாசை அன்று பொதுவாக தந்தையில்லாதவர்கள் ஒவ்வொரு மாத அமாவாசையின் போதும் குடும்பத்தின் மூன்று தலைமுறை ஆண், பெண்களுக்கு தர்ப்பணம் செய்வது வழக்கம். ஆனால் மகாளய அம்மாவசை அன்று கொடுக்கப்படும் திதியை நம் தலை முறையில் நாம் அறிந்தும் அறியாது வாழ்ந்து மறைந்த அனைத்து முன்னோர்களும் பெற்றுக் கொள்வதாக ஐதீகம். எனவேதான் மறந்து போனவர்களை மகாளயத்தில் சேர் என்றனர் நம் முன்னோர்கள்.
இறந்த நம் முன்னோர்களில் யாருக்கேனும் இறந்த தின திதி தெரியாவிட்டால் அவர்களுக்கு மகாளயதில் திதி கொடுக்கலாம். மேலும் நமது உறவினர்கள் தவிர நமது குருமார்கள், நம்முடன் நெருங்கி பழகி இறந்தவர்கள் என யாரை வேண்டுமானாலும் நினைத்து இந்நாட்களில் மட்டும் தர்பணம் செய்யலாம். அது அவர்களுக்கு ஆன்ம சாந்தியையும நமக்கு நன்மையையும் அளிக்கும்.
முடிந்தவரை அருகே உள்ள புண்ணிய நதிக்கரை அல்லது நீர் நிலைகளுக்கு அருகே உள்ள அரசமரத்தடியில் சென்று முறைப்படித் தர்ப்பணம் செய்வது நல்லது. அதற்கு வாய்ப்பு இல்லாதவர்கள் அவரவர்கள் வீட்டிலேயே படையல் இட்டு வழிபடலாம். பிண்டம் மற்றும் எள்ளும் தண்ணீரும் தர்பணத்தில் பிரதானமாகும். மகாளய அமாவாசை அன்று முன்னோர்களை நினைத்து வழிபட்டால் ஆண்டு முழுவதும் வரும் அமாவாசை நாட்களில் வழிபாடு செய்த பலன்கள் கிடைக்கும்.
பித்ருக்களை நினைவு கூற உள்ள பிற நாட்கள்
அறிந்தும் அறியாமலும் நம் வம்சா வழியில் வாழ்ந்து மறைந்த முன்னோர்களுக்கான தர்பணம் கொடுப்பதில் மகாளய பட்சம் மற்றும் மகாளய அம்மாவசை காலம் மிகவும் உகந்ததாகும்.
இது தவிர தை மாத அம்மாவாசை மற்றும் ஆடி மாத அம்மாவசை ஆகிய நாட்களும் பித்ரு தர்பணத்திற்கு உகந்த காலங்களாகும்.
